Me një event që mbajti vërtet premtimin e titullit “Awe-Dropping”, Apple prezantoi zyrtarisht linjën e re të iPhone 17, duke shënuar një nga ndryshimet më të mëdha dizajnuese dhe teknologjike në vitet e fundit. Eventi, i mbajtur në Steve Jobs Theater në zemër të Apple Park, solli katër modele të reja – iPhone 17, iPhone 17 Air, iPhone 17 Pro dhe Pro Max – dhe një vizion të qartë për të ardhmen e smartfonëve.

 

Apple ka prezantuar iPhone-in më të hollë ndonjëherë – iPhone Air, vetëm 5.6 mm trashësi. Pajisja ka një ekran 6.5” ProMotion me rifreskim deri në 120Hz dhe ndriçim maksimal prej 3,000 nits. Me strukturë titani dhe mbulesë Ceramic Shield, ky është dizajni më rezistent i Apple deri më sot.

iPhone Air përmban çipin A19 Pro, modemin e ri C1x (dy herë më i shpejtë se paraardhësi) dhe çipin N1, që sjell mbështetje për Wi-Fi 7, Bluetooth 6 dhe Thread. Megjithë trupin ultra-të hollë, ofron deri në 40 orë video playbackdhe përdor vetëm eSIM për të kursyer hapësirë.

 

Kamera e pasme është 48 MP me dy lente, ndërsa selfie kamera mbështet Center Stage. iPhone Air shënon fillimin e një plani 3-vjeçar për ridizajnimin e linjës iPhone. Pajisja vjen me iOS 26 dhe dizajnin e ri vizual Liquid Glass.

iPhone 17 vjen me standardin e ri, një ekran më të madh prej 6.3” dhe rifreskim ProMotion 120Hz. Dizajni mbetet thuajse i pandryshuar nga iPhone 16, por sjell ngjyra të reja. Pika kryesore janë përmirësimet në kamera: një sistem “dual fusion” 48 MP, që bashkon funksionin e kamerës kryesore dhe asaj telefoto në një lente të vetme, si dhe një kamerë ultragjerë 48 MP, 4 herë më e detajuar se më parë.

Kamera e përparme vjen me rezolucion 12 MP dhe teknologjinë Center Stage, duke lejuar shkrepjen e selfie cilësore në modin horizontal, pa rrotulluar telefonin.

iPhone 17 pason suksesin e iPhone 16, i cili solli Action Button, butonin Camera Control dhe një kthim në vendosjen vertikale të kamerave. Megjithëse AI-ja ishte e theksuar, shumë veçori nuk u lançuan, por kjo nuk ndikoi në shitje.

 

iPhone 17 Pro dhe Pro Max

iPhone 17 Pro dhe iPhone 17 Pro Max sjellin ndryshime të rëndësishme në dizajn dhe performancë. Të dy modelet vijnë me trup prej alumini dhe mbrojtje të përparme dhe të pasme me Ceramic Shield. Pjesa e përparme tani përdor Ceramic Shield 2, me rezistencë ndaj gërvishtjeve trefish më të lartë, ndërsa pjesa e pasme është katër herë më rezistente ndaj çarjeve.

iPhone 17 Pro ka ekran 6.3 inç, ndërsa Pro Max 6.9 inç, me ndriçim maksimal deri në 3,000 nits dhe kontrast më të mirë në ambiente të ndriçuara. Sistemi i ri i kamerave përfshin tri kamera 48 MP, me zoom optik deri në 8x dhe një kamerë të përparme 18 MP me mbështetje për Center Stage.

Pajisjet përdorin çipin A19 Pro, me performancë deri në 40% më të mirë, ftohje me një dhomë specifike avulli, çip N1 për Wi-Fi 7 dhe Bluetooth 6, si dhe bateri më të madhe. Modelet ofrojnë deri në 39 orë jetëgjatësi video.